సొంతగడ్డపై టీ20 సిరీస్లో న్యూజిలాండ్ జోరు కొనసాగిస్తోంది. ఇంగ్లాండ్తో మంగళవారం జరిగిన మూడో టీ20 మ్యాచ్లో 14 పరుగుల తేడాతో విజయాన్ని అందుకున్న న్యూజిలాండ్ జట్టు.. ఐదు టీ20ల సిరీస్లో 2-1తో ఆధిక్యాన్ని అందుకుంది. దాదాపు చేజారిపోయిన మ్యాచ్ని కివీస్ అనూహ్యంగా ఒడిసిపట్టుకున్న తీరు మ్యాచ్కే హైలైట్గా నిలిచింది.
మ్యాచ్లో టాస్ గెలిచి తొలుత బ్యాటింగ్ చేసిన న్యూజిలాండ్ జట్టు.. గ్రాండ్హోమ్ (55: 35 బంతుల్లో 5×4, 3×6) హాఫ్ సెంచరీ బాదడంతో నిర్ణీత 20 ఓవర్లలో 7 వికెట్ల నష్టానికి 180 పరుగులు చేసింది. అనంతరం ఛేదనకు దిగిన ఇంగ్లాండ్ జట్టు.. ఓపెనర్ డేవిడ్ మలాన్ (55: 34 బంతుల్లో 8×4, 1×6), జేమ్స్ విన్స్ (49: 39 బంతుల్లో 4×4, 1×6) దూకుడుగా ఆడటంతో గెలిచేలా కనిపించింది. కానీ.. 15వ ఓవర్లో కెప్టెన్ ఇయాన్ మోర్గాన్ (18: 13 బంతుల్లో 2×4) ఔటవడంతో ఒత్తిడిలో పడిన ఇంగ్లాండ్ వరుసగా వికెట్లు చేజార్చుకుంది. ఎంతలా అంటే.. ఆఖర్లో ఆ జట్టు కేవలం 10 పరుగుల వ్యవధిలోనే ఐదు వికెట్లు కోల్పోయింది. దీంతో.. చివరికి 166/7తో సరిపెట్టుకున్న ఇంగ్లాండ్.. కివీస్ చేతిలో వరుసగా రెండో టీ20లోనూ ఓడిపోయింది. ఇక నాలుగో టీ20 మ్యాచ్ శుక్రవారం జరగనుంది. కివీస్ బౌలర్లలో లూకీ ఫర్గూసన్, టింక్ చెరో రెండు వికెట్లు పడగొట్టగా.. ఇస్ సోదీ, మిచెల్ శాంట్నర్ తలో వికెట్ తీశారు. శామ్ బిల్లింగ్స్ రనౌట్గా వెనుదిరిగాడు.
