సన్నీ లియోన్ గురించి ప్రత్యేకంగా చెప్పాల్సిన అవసరం లేదు. యూత్ మొత్తానికి ఆమె గురించి బాగా తెలుసు. ధోని, సచిన్ వంటి దిగ్గజాల గురించి కూడా పరిచయాలు అవసరం లేదు. ఇప్పుడు ఎందుకని వీళ్ల ప్రస్తావన వచ్చిందంటే.. ధోని, సచిన్లు సన్నీ లియోన్ కన్నా చాలా డేంజరస్. ఈ మాట అంటున్నది నేను కాదు. మెకాఫ్ అనే సైబర్ సెక్యూరిటీ సంస్థ.
మెకాఫ్ తాజాగా మోస్ట్ డేంజరస్ సెలబ్రిటీ లిస్ట్ 2019ను విడుదల చేసింది. ఇందులో ఎంఎస్ ధోని టాప్లో ఉన్నారు. ఈయన తర్వాతి స్థానంలో సచిన్ టెండూలర్క్ నిలిచారు. ఇక నాలుగో స్థానంలో సన్నీ లియోన్ ఉన్నారు. మూడో స్థానంలో గౌతమ్ గులాటి నిలిచారు.
Most Dangerous Celebrity List 2019 టాప్ 10లో బాద్షా, రాధిక ఆప్టే, శ్రద్ధా కపూర్, హర్మన్ప్రీత్ కౌర్, పీవీ సింధు, క్రిస్టియానో రొనాల్డో వంటి వారు ఉన్నారు. మీరు ధోని, సచిన్, సన్నీ లియోన్ వంటి టాప్ 10లో ఉన్న వారి పేర్లను ఆన్లైన్లో సెర్చ్ చేస్తే మీ ఆర్థిక సమాచారం ప్రమాదంలో పడిపోయే అవకాశముందని మెకాఫ్ తెలిపింది.
జాబితాలోని వారి పేర్లతో ఆన్లైన్లో సెర్చ్ చేసినప్పుడు మోసపూరిత వెబ్సైట్లు, వైరస్ల బారినపడే అవకాశముందని మెకాఫ్ హెచ్చరిస్తోంది. సైబర్ క్రిమినల్స్ కన్సూమర్లను ఆకర్షించేందుకు ఈ సెలబ్రిటీలకు సంబంధించిన కంటెంట్తో మోసపూరిత వెబ్సైట్లను, లింక్లను క్రియేట్ చేస్తుంటారని, వీటిల్లోకి ఎంటర్ అయినప్పుడు మాల్వేర్ సాయంతో వ్యక్తిగత, ఆర్థిక సమాచారాన్ని తస్కరిస్తారని వివరించింది.
వెబ్సైట్స్ లేదా లింక్లపై క్లిక్ చేయడంతో ఐడెంటిటీ థెఫ్ట్, బ్యాంకింగ్, క్రెడిట్ కార్డు, ఆన్లైన్ షాపింగ్ మోసాలు, స్కిమ్మింగ్ మాల్వేర్ ఇన్స్టాలేషన్, ట్రాకింగ్, మానిటరింగ్ సాఫ్ట్వేర్, రాన్సమ్వేర్ ఇన్స్టాలేషన్, ట్రోజన్స్ వంటి సమస్యలను ఎదుర్కోవలసి వస్తుందని మెకాఫ్ హెచ్చరించింది. యూజర్ వివరాలు దొంగలించడంతో హ్యాకర్లు బ్యాంకింగ్ వివరాలను పొందే ప్రమాదముందని తెలిపింది. దీంతో డిపాజిట్లు, ఇతర ఫైనాన్సియల్ ఆస్తులకు రిస్క్ కలగొచ్చని పేర్కొంది.
