భారత టెస్టు జట్టులోకి అరంగేట్రం చేసిన మ్యాచ్లోనే స్పిన్నర్ నదీమ్ తన తెలివైన బౌలింగ్తో అందర్నీ ఆకట్టుకుంటున్నాడు. దక్షిణాఫ్రికాతో రాంచీ వేదికగా జరుగుతున్న మూడో టెస్టు మ్యాచ్లో సమయోచితంగా బౌలింగ్ చేస్తున్న నదీమ్.. సఫారీ బ్యాట్స్మెన్లను ఉక్కిరిబిక్కిరి చేస్తున్నాడు.
ఇన్నింగ్స్ 29వ ఓవర్ వేసిన నదీమ్ బౌలింగ్లో క్రీజు వెలుపలికి వచ్చి బంతిని డిఫెన్స్ చేయబోయిన బవుమా (32: 72 బంతుల్లో 5×4) బంతి అందకపోవడంతో స్టంపౌటయ్యాడు. నదీమ్కి టెస్టు కెరీర్లో ఇదే తొలి వికెట్కాగా.. బవుమా ఔటైన తీరు నవ్వు తెప్పిస్తోంది. సోమవారం తొలి సెషన్లో బవుమా క్రీజు వెలుపలికి వచ్చి ఆడేలా నదీమ్ వరుసగా ఊరించే బంతులు విసిరాడు. జార్ఖండ్కి చెందిన నదీమ్కి రాంచీ గ్రౌండ్ సొంత మైదానం.
మొదట బవుమా పాదాల వద్ద బంతులు విసిరిన నదీమ్.. ఆ తర్వాత కొద్దిగా కొద్దిగా దూరం పెంచుతూ వెళ్లాడు. దీంతో.. బవుమా కూడా క్రమంగా క్రీజు వెలుపలికి వచ్చి ఆడటం మొదలెట్టాడు. దీంతో.. తన వ్యూహంలో బవుమాని చిక్కాడని నిర్ధారించుకున్న నదీమ్.. లెగ్ స్టంప్ లైన్పై బంతి విసిరి కొద్దిగా టర్న్ చేయగా.. ఆ బాల్ని ఆడేందుకు క్రీజు వదిలి చాలా దూరం ముందుకు వచ్చిన బవుమా డిఫెన్స్ చేసేందుకు ట్రై చేశాడు. కానీ.. బంతి అతని బ్యాట్కి చిక్కలేదు. దీంతో.. వెంటనే కాలితోనైనా దాన్ని అడ్డుకునే ప్రయత్నం చేశాడు. అయినప్పటికీ లాభం లేకపోయింది. వెనక్కి వెళ్లిన బంతి కీపర్ సాహా చేతిలో పడగా.. రెప్పపాటులో అతను వికెట్లని గీరాటేశాడు. అప్పటికే స్టంపౌట్ ప్రమాదాన్ని పసిగట్టిన బవుమా క్రీజులోకి వచ్చేందుకు ప్రయత్నించాడు. కానీ.. అతనికి నిరాశే ఎదురైంది.
