అదొక పెద్ద కంపెనీ. ప్రపంచ వ్యాప్తంగా పేరున్న సంస్థ. ఆ కంపెనీకి బాస్ హోదాలో ఉన్న వ్యక్తి.. ఆయన కింద పనిచేస్తున్న ఉద్యోగినితో రాసలీలలు కొనసాగించారు. కట్ చేస్తే విషయం అందరికీ తెలిసిందే. దీంతో కంపెనీ ఆయనను ఉద్యోగంలో నుంచి పీకేసింది. ఆయన గతేడాది ఏకంగా రూ.100 కోట్లకు పైగా వేతనం తీసుకోవడం గమనార్హం. ఆయన పేరు స్టీవ్ ఈస్టర్బ్రూక్. ఆయన సీఈవోగా ఉన్న కంపెనీ మెక్డొనాల్డ్స్. స్టీవ్ ఈస్టర్బ్రూక్ నిబంధనలకు విరుద్ధంగా సహ ఉద్యోగినితో శారీరక సంబంధం కొనసాగించడంతో ఆయనపై మెక్డొనాల్డ్స్ వేటు వేసింది. మెక్డొనాల్డ్స్ విధానాలను ఉల్లంఘించి పరస్పర అంగీకారంతో ఉద్యోగినితో ఎఫైర్ నడిపించిన స్టీవ్ ఈస్టర్బ్రూక్ను తొలగించాలని కంపెనీ బోర్డు నిర్ణయం తీసుకుందని మెక్డొనాల్డ్స్ పేర్కొంది.
ఇకపోతే స్టీవ్ ఈస్టర్బ్రూక్ స్ధానంలో క్రిస్ కెంప్జిన్స్కిని కంపెనీ సీఈవోగా నియమిస్తూ మెక్డొనాల్డ్స్ నిర్ణయం తీసుకుంది. ఈయన గతంలో మెక్డొనాల్డ్స్ యూఎస్ఏ ప్రెసిడెంట్గా పనిచేశారు. కంపెనీ నిబంధనలకు విరుద్ధంగా ఉద్యోగినితో సంబంధం కొనసాగించడం పొరపాటేనని స్టీవ్ ఈస్టర్బ్రూక్ పేర్కొన్నారు. మెక్డొనాల్డ్స్ పాటించే విలువలను గౌరవిస్తున్నానని, అందుకే తాను తప్పుకోవాలన్న బోర్డు నిర్ణయాన్ని అంగీకరిస్తానని తెలిపారు. స్టీవ్ ఈస్టర్బ్రూక్ 2015లో మెక్డొనాల్డ్స్ సీఈవోగా నియమితులయ్యారు. అప్పటికే కంపెనీ కస్టమర్లకు కాపాడుకోవడంలో గడ్డు పరిస్థితులను ఎదుర్కొంటోంది. ఈస్టర్బ్రూక్ రాకతో కంపెనీకి మళ్లీ పూర్వ ఉత్తేజం వచ్చింది. అమెరికా టాప్ ఫాస్ట్ఫుడ్ సంస్థగా తన స్థానాన్ని పదిలం చేసుకుంది. స్టీవ్ ఈస్టర్బ్రూక్ గతేడాది రూ.112 కోట్ల వేతనం అందుకున్నారు.
